თსუ-ს კლასიკური ფილოლოგიის, ბიზანტინისტიკისა და ნეოგრეცისტიკის ინსტიტუტში „ანტიკური კავკასიის“ ხუთტომეული  ენციკლოპედიის პრეზენტაცია გაიმართა. ღონისძიება საქართველოს მეცნიერებათა ეროვნული აკადემიის პრეზიდიუმთან მოქმედი შავი და ხმელთაშუა ზღვების რეგიონის ცივილიზაციათა შემსწავლელ კომისიასა და საქართველოს საპატრიარქოს ქართველოლოგიური კვლევის ცენტრთან თანამშრომლობით ჩატარდა. „ანტიკური კავკასიის“ ენციკლოპედიის პირველი ტომი თსუ-ს კლასიკური ფილოლოგიის, ბიზანტინისტიკისა და ნეოგრეცისტიკის ინსტიტუტში, პროფესორ რისმაგ გორდეზიანის ხელმძღვანელობით, 2010 წელს გამოსცეს. მეხუთე – დამასრულებელი ტომი რუკებსა და ილუსტრაციებს ეთმობა. პირველ განყოფილებაში ძველაღმოსავლური ტექსტების თარგმანებია შესული: ხეთური, ასურული, ურარტული, სპარსული, მეორეში  – ბერძნულენოვანი ორიგინალის წყაროები და თარგმანი ქართულ ენაზე, მესამეში  – ლათინურენოვანი ორიგინალის წყაროები და თარგმანი ქართულ ენაზე, მეოთხეში კი ბიბლიური ტექსტების ქართული თარგმანები.

„კლასიკური ფილოლოგიის, ბიზანტინისტიკისა და ნეოგრეცისტიკის ინსტიტუტის  შემდეგ ჩემს ცხოვრებაში „ანტიკური კავკასიის“ ენციკლოპედია ყველაზე მნიშვნელოვანია.

ეს ენციკლოპედია ცოცხალი ორგანიზმია, რის შესაქმნელადაც დიდი შრომა ჩაიდო და მისი მუდმივრეჟიმში განახლება აუცილებელია. უკვე მიმდინარეობს ენციკლოპედიის გაციფრების პროცესი ქართველოლოგიურ კვლევის ცენტრთან თანამშრომლობის ფარგლებში.

ვფიქრობ, ბევრი სტატიის დამატება დაგვჭირდება, განსაკუთრებით კარტოგრაფიული მონაცემებიდან იქნება საჭირო ცალკეული ტოპონიმების, ცალკეული ადგილების შესახებ სტატიებით შევსება, გვექნება უცხოელი მეცნიერების მოწვევის საშუალებაც, მკვლევრების ნაწილმა უკვე გამოთქვა ჩვენთან თანამშრომლობის სურვილი. ძალიან საამაყოა, რომ ამ ენციკლოპედიაზე ჩემს მოსწავლეებთან და ახლა უკვე ჩემს კოლეგებთან ერთად ვმუშაობ. ვფიქრობ, ადამიანისთვის ეს ყველაზე სასიხარულო გრძნობაა“, – განაცხადა პროფესორმა რისმაგ გორდეზიანმა.

„ანტიკური კავკასიის“ ენციკლოპედიის გამოცემა ჩვენი ინსტიტუტის დიდი მიღწევაა. ენციკლოპედია მოიცავს ამომწურავ ინფორმაციას ანტიკური კავკასიის შესახებ, ასახულია როგორც ბერძნულ-რომაულ, ისე აღმოსავლეთის უძველეს წყაროებში შემონახული ინფორმაცია. მოცემულია კავკასიის რეგიონის ამსახველი ტერმინოლოგიის ისტორია. ენციკლოპედიაში შესულია რუკები, პალეოგრაფიული მონაცემები, ეპიგრაფიკული მასალა, ანუ ყველაფერი, რაც კავკასიის შესახებ არსებობს, გაერთიანებულია. ვფიქრობ, ყველასთვის, ვინც ამ საკითხით არის დაკავებული, ეს ენციკლოპედია სამაგიდო წიგნი გახდება“, – აღნიშნა თსუ-ს კლასიკური ფილოლოგიის, ბიზანტინისტიკისა და ნეოგრეცისტიკის ინსტიტუტის დირექტორმა, პროფესორმა ლევან გიგინეიშვილმა.

პრეზენტაცია-განხილვას ენციკლოპედიის საგამომცემლო ჯგუფი, თსუ-ს ვიცე-რექტორი ერეკლე ასტახიშვილი, პროფესორ-მასწავლებლები, სტუდენტები, განათლებისა და მეცნიერების სამინისტროსა და უნივერსიტეტის ადმინისტრაციის წარმომადგენლები ესწრებოდნენ.

თსუ-ს ვიცე რექტორის ერეკლე ასტახიშვილის თქმით, მნიშვნელოვანია, რომ ენციკლოპედიის ხუთტომეული ინგლისურ ენაზე ითარგმნოს და საერთაშორისო სამეცნიერო საზოგადოებისთვისაც ხელმისაწვდომი გახდეს.

თარგმნის პროცესის მხარდაჭერის სურვილი გამოთქვა საქართველოს განათლებისა და მეცნიერების სამინისტროს მეცნიერების განვითარების დეპარტამენტის უფროსმა: „ანტიკური კავკასიის“ ენციკლოპედიის ხუთტომეული მრავალი წლის სამეცნიერო შრომის შედეგია. ის უმნიშვნელოვანესი, მსოფლიო მასშტაბის გამოცემაა და მზად ვართ შესაბამისი მხარდაჭერისთვის“, – აღნიშნა ქეთევან ქოქრაშვილმა.

„ანტიკური კავკასიის“ ენციკლოპედიის გაციფრებაზე მუშაობა უკვე დაწყებულია. პროცესს თსუ-ს კლასიკური ფილოლოგიის, ბიზანტინისტიკისა და ნეოგრეცისტიკის ინსტიტუტის ასოცირებული პროფესორი ირინე დარჩია ხელმძღვანელობს.