ახალი სტუდენტური პროექტი – „სამხრეთ კავკასია – სივრცე, საზოგადოება, პოლიტიკა“
„რუსეთის მიერ უკრაინაში შეჭრამ კიდევ უფრო გაამძაფრა ეჭვები, რომ რუსეთმა შესაძლოა საქართველოსა და მოლდოვისკენ „მობრუნება“ განიზრახოს. ეს ვითარება მთლიანად ცვლის სამხრეთ კავკასიის რეგიონის უსაფრთხოების კონცეფციას. ჩვენ გვჭირდება სიფრთხილე, რაც გამორიცხულია ცოდნის გარეშე, რადგან თუ არ გვექნება ცოდნა, ვერ გავაანალიზებთ მიმდინარე პროცესებს და ვერ გვექნება უსაფრთხოების გარანტია“, — ამბობს თსუ-ის სოციალურ და პოლიტიკურ მეცნიერებათა ფაკულტეტის სტუდენტი დაჩი ჩიტაია, რომელმაც ახალი სტუდენტური პროექტი — „სამხრეთ კავკასია — სივრცე, საზოგადოება, პოლიტიკა“ — დაიწყო.
პროექტის ფარგლებში, თსუ-ში ერთი თვის განმავლობაში სალექციო კურსი წარიმართება, სადაც თსუ პროფესორ-მასწავლებლები სტუდენტებს სამხრეთ კავკასიაში მიმდინარე გეოპოლიტიკური, უსაფრთხოების, ეკონომიკური, სოციალურ-პოლიტიკური და სამხრეთ კავკასიის სამივე ქვეყნის — საქართველოს, სომხეთისა და აზერბაიჯანის სახელმწიფო მართვის პოლიტიკის შესახებ ლექციებს წაუკითხავენ.
„წინა სემესტრში მიმოვიხილეთ სამხრეთ კავკასიის ისტორია, ახლა მთავარი აქცენტი თანამედროვე ვითარებაზეა გადატანილი, ცხადია, ისტორიული წინამძღვრებით. უნივერსიტეტში აკადემიური კურიკულუმით არ არის გათვალისწინებული ერთიანი სისტემური სასწავლო კურსი, რომლის ფარგლებში სტუდენტები აღნიშნულ საკითხებზე ფუნდამენტურ ცოდნას მიიღებენ და ამიტომ გადავწყვიტეთ ამ პროექტის განხორციელება. თემატიკა აქტუალურია, ყარაბაღის ომმა მთლიანად ამოაყირავა რეგიონში არსებული გეოპოლიტიკური წესრიგი. სამხრეთ კავკასიის რეგიონი ევროკავშირის, ამერიკის, ჩინეთის, რუსეთის და ახლო აღმოსავლეთის ქვეყნების ინტერესის სფეროა, რადგან მნიშვნელოვანი საპორტო, სარკინიგზო და ასევე მილსადენების გზაგამტარია. გვაქვს აქტიური კონფლიქტური რეგიონები. ეს არის ჩვენი ყოველდღიურობა და, შესაბამისად, მნიშვნელოვნად მივიჩნიეთ სტუდენტებისთვის ამ პროექტის შეთავაზება. ლექციებს, ძირითადად, სოციალურ და პოლიტიკურ მეცნიერებათა და ჰუმანიტარულ მეცნიერებათა ფაკულტეტის სტუდენტები ესწრებიან“, — აღნიშნავს დაჩი ჩიტაია.
სამხრეთ კავკასიაში არსებული გეოპოლიტიკური ვითარების შესახებ პროექტის ავტორები სტუდენტური სამეცნიერო კონფერენციებისა და ღია აკადემიური დისკუსიების მოწყობასაც გეგმავენ, სადაც სამხედრო, საერთაშორისო სამართლისა და სხვა დარგების წამყვანი სპეციალისტები ჩაერთვებიან.
